52分鐘，加比爾喺半場偏左位置頭槌解圍，但頂喺加拿曹身上，結果比佢直闖禁區橫傳比B費熨射入網領先1比0。54分鐘，麥佳亞喺禁區內頭槌解圍失誤，頂喺美連奴腳下再傳交比夏維斯喺6碼點施射，但好可惜射斜。61分鐘，達洛治向美連奴作出鹵莽攔截，領得今場第2面黃牌被逐。63分鐘，比恩迪殊面對高波打手槌被加比爾截得皮球左腳凌空射門省中門前嘅迪列治後改變方向入網追成平手1比1兼將功補過。愛隊本有機會反超前，麥佳亞喺70分鐘禁區内出手整跌夏維斯，但狀態麻麻嘅隊長奧迪哥特操刀被比恩迪殊救出，呢一次嘅失誤就留低出局嘅敗筆。隨後我哋依然利用人多優勢狂攻，後備落場嘅懷斯兩次機會都不能轉化為入球就注定要加時30分鐘。
喺加時當中愛隊繼續圍攻，102分鐘，夏維斯喺禁區右路傳波比門前嘅托沙，但迪列治快托沙一步將皮球踢高解圍，紅魔又一次逃過一劫成功捱過加時，進入互射12碼階段，好不幸，嗰一件不祥嘅白色戰衣可能嚇怕咗幸運女神，喺5射當中有一射不入，夏維斯嘅射門被比恩迪殊救出，而紅魔則5射全中以5比3勝出。
喺失落足總盃之後，我哋亦都要馬不停蹄喺3日後星期四凌晨主場大戰熱刺作北倫敦打比，What do you think of Tottenham？！