下半場愛隊繼續主導賽事,54分鐘薩卡右路作個人突破,帶波殺入禁區近射中横楣出界。呢一球唔入就埋下輸波嘅伏線,56分鐘加比爾禁區侵犯利明拿,VAR檢視後判富咸獲得12碼,馬查主射得手,富咸領先1比0。落後下達帥先後換入比比同尼基迪亞加強攻力,79分鐘薩卡交出靚波,但尼基迪亞起腳射斜,尾段87分鐘薩卡遠射又僅僅喺楣頂出界,完場前馬天尼利近射又被阿希奧拿救出。去到補時第6分鐘,尼基迪亞終於喺門前混戰中近射得手,最終追回1球主場以1比1同客軍打成平手,各得1分。
相信唔駛多講,如果各位有睇呢場球賽嘅話都會認同VAR喺今場賽果係起到好關鍵性嘅作用,可能英超嘅VAR係世界上係特別嚴謹!過咗去就過咗去,我哋向前望,五日後嘅24號凌晨我哋將會主場對愛華頓,寄望愛隊唔好因為VAR而氣餒,繼續再接再厲以3分為目標,COYG!