週一, 01 四月 2024 10:33

作客曼城賽後報告

7分鐘,愛隊喺右路由韋治近底線傳中,耶穌仔心口控定起腳射遠柱,但係喺柱邊出界。16分鐘,曼城左路開出角球,艾基近門頭槌被拉耶抱實。主隊雖佔有7成以上控球權,不過受制愛隊嚴密防守,其實威脅埋門不多,4次射門只得1次中框。喺各自穩打穩紮之下結果以0比0完上半場返回更衣室。
下半場一開波,哥華傑治就試喺禁區外施射,不過不中目標。戰情之後可以用平淡嚟形容,61分鐘,藍月將哥華傑治同埋霍頓換出,換入杜古同加利殊,欲想加強兩邊側擊,雖然傳中多咗,但同樣好似上半場一樣受制我哋嚴密嘅防守而冇乜具威脅攻門。愛隊亦嘗試先後調入湯馬斯,富安健洋,托沙同馬天尼利加強反擊,機會一直要去到尾段出現。86分鐘,托沙喺左路窄角度下笠射,但過唔到奧迪加,最後終以0比0握手言和。
睇返聯賽榜方面,因今輪比賽失咗2分,愛隊而家榜首位置被利物浦以2分壓過跌落第2位,得分65分,而曼城則繼續以64分守住第3位。
而我哋下一輪賽事將會喺3天後嘅星期四凌晨主場對盧頓,寄望愛隊要運用高效嘅戰術喺盧頓身上盡取3分兼多取得球,信愛隊一定做得到!
閱讀 176 次數