週二, 30 四月 2024 05:06

作客對熱刺賽後報告

Happy St Totteringham's Day !

今仗愛隊喺北倫敦打比大戰沿用番上仗擊敗車路士5比0嘅正選11人。
11分鐘,托沙喺禁區被孫興慜搶走皮球後傳比麥迪臣起腳,好彩炒高,跟著愛隊喺1分鐘後就入波!可惜係炸糊!12分鐘,隊長奧迪哥特越位在先而令到夏維斯嘅入球無效。入球就喺15分鐘出現,薩卡開出角球,靴爾保喺富安健洋力壓之下擺老烏,愛隊領先1比0。而熱刺落後下亦積極反撲,羅美路兩下頭槌攻門亦都無功而還,23分鐘,主隊曾經由雲迪芬一度喺小禁區將皮球掃入網,但經VAR檢測後判越位在先而無效。27分鐘,夏維斯大腳交波比薩卡半單刀射遠柱領先至2比0。38分鐘,懷斯開出角球,夏維斯銅頭一搖又破網遙遙領先至3比0。44分鐘,孫興慜半單刀門前炒高後宣布落後愛隊0比3齊齊返回更衣室。

50分鐘,羅美路頭槌攻門,不過網頂出界。52分鐘,薩卡近門燙射,不過被域卡利奧用腳擋出而未能多添入球。今仗一個非常關鍵時刻就喺64分鐘出現,拉耶犯錯將皮球誤傳比羅美路,佢控球後一射破網追成1比3。除咗拉耶嘅錯誤之外,另一個具爭議性既12碼掀起球賽尾段嘅高潮,87分鐘,戴維斯禁區疑似被懷斯侵犯之下,球證再檢視VAR後直指12碼由孫興慜主射中鵠主隊追成2比3。雖然熱刺補時階段強攻,但愛隊後防非常有效率之下力守到尾,最後成功作客以3比2擊敗熱刺赢出北倫敦打比。
睇返聯賽榜方面,愛隊有驚無險以3比2險勝後以35戰得80分排榜首,比少賽1場嘅曼城多1分。而我哋下一場賽事將會喺4日後嘅星期六晚上主場對般尼茅夫,緊記奮戰到底全取3分!

閱讀 151 次數