上半場3分鐘,孫興慜將比素馬嘅埋門改變方向將皮球送入網,但越位在先可謂有驚無險。14分鐘,薩卡傳中比耶穌仔左路近底線射門,但被域卡利奧救出。16分鐘,尤度基回傳乏力,尼基迪亞半單刀射近柱又被救出。戰況去到26分鐘終打開紀錄,薩卡帶波切入中路射門省中羅美路改變方向破網領先1比0。領先後當然繼續攻,31分鐘,耶穌仔禁區逼甩麥迪臣腳下球抽射,可惜射高。37分鐘,麥迪臣右路傳中比莊遜抽射,好彩拉耶撲出,42分鐘,莊遜射門被撲出,麥迪臣搶到皮球喺底線傳中,孫興慜第一時間撞射貼遠柱入網追平1比1完上半場。
愛隊喺闊別歐聯多年後再一次踏上征途,喺第一場分組賽主場對荷蘭聯賽榜首勁旅PSV燕豪芬。
我哋開局非常好,上半埸8分鐘,隊長奧迪哥特喺禁區邊起腳,賓尼迪斯撲出皮球不遠被薩卡補中領先客軍1比0。20分鐘,耶穌仔分波至右路,薩卡傳中比托沙射入擴大比數至2比0。38分鐘,入波功臣托沙傳中比耶穌仔遠柱射入,愛隊上半場遙遙領先3比0進入更衣室。